Onse Vader, ek eer U dat U die enigste ware God van ewigheid af is.
Dat U die mens so liefgehad het dat U Jesus Christus gestuur het as Redder
Dat U volmag aan die Seun gegee het om almal wat U Hom gegee het die ewige lewe te gee.
Dat U verduidelik wat die ewige lewe is: om U, die enigste ware God te ken asook Jesus Christus U gestuurde.
Dankie Jesus Christus dat U ook die Vader verheerlik het deur U werk op aarde te volbring.
Dankie Jesus vir die belofte dat ek deur U ook aan die Vader behoort.
Dankie dat U my hart kom vernuwe het sodat ek U Woord in my hart kan koester.
Dankie vir die versekering dat ek deur Jesus die Vader se woorde aangeneem het en in volle oortuiging glo dat Jesus, Vader se Gestuurde is.
Dankie Jesus dat U ook vir my bid omdat ek aan U behoort en deur U aan die Vader.
Ek bring eer en lof aan U vir die offer wat U gebring het. Ek dank U ook dat al is ek in hierdie wereld ek reikhalsend kan uitsien na die koninkryk van God.
En dit is die ewige lewe: dat hulle U ken, die enigste ware God, en Jesus Christus, wat deur U gestuur is. Joh 17:3
Heilige Vader, dankie dat U my bewaar en beskerm in Jesus Christus sodat ek nie verlore sal gaan nie.
Dankie Vader dat Jesus op die derde dag opgestaan het en opgevaar het na U toe. Deur U woord is U blydskap in al sy volheid ook in my. Gee dat ek altyd sal onthou dat ek nie van hierdie wêreld is of aan die wêreld behoort nie. Ek is aan U toegewy deur die waarheid. U woord is die waarheid.
U opdrag is om in Jesus te bly soos Jesus in die Vader is sodat ek ook een met die Drie-Eenheid kan wees. Dat my optrede ‘n bewys aan die wêreld kan wees dat U ook vir my stuur om U woord te deel en dat mense kan weet U liefde is by elkeen wat in aanbidding voor U buig.
Vader open my geestelike oë dat ek U heerlikheid kan sien want U het Jesus liefgehad voor die skepping van die wêreld en in Jesus ook vir my.
Regverdige Vader, deur Jesus ken ek U, en weet dat U Jesus met die goeie nuus gestuur het. Dankie Jesus dat ek die Vader deur U geleer ken het. Dankie dat U my lei om ook die goeie nuus van verlossing en liefde ook verder sal versprei. Dankie dat U die Koning van my hart is en met liefde my regeer.
Amen.
